CCCXXV.

1424, Mai 23. Kamenz.

Abt Nicolaus verkauft fünf Morgen Wiesenwachs an den Scholzen zu Dörndorf.

In gotis namen amen. Wir brudir Nicolaus von Paczkaw, von gotis gnoden apth czu Kamencz thuen kunt und czu wissen allen den, di desen briff sehen, horen adir lesen, daz wir mit guthem rathe und willen unser eldisten und unser sampnunge recht und redlich vorkouft haben von unser und von unser nockomelingen wegin, fumff morgen wezewachs, gelegin czwisschen dem Schrame und Slobottendorff, unserm lieben getrawen Michil Fogolusch schulteys czum Durrendorff, umb eyne genante summa geldis, di uns von im iczunt gancz und gar beczalt ist und vorgulden. Dorumb so habe wir gereycht und reychen in dem namen gotis mit desim briffe di obgenanten fumff morgen wezewachs dem vorgenanten Michil Fogolusch, schulteys czum Durrendorff, synen elichen erben und alle seynen rechten nochkomelingen erblich und ewiclich czu besitczen, czu gebruchin czu genyssen und domethe czu thuen und czu lossen, dach unschedlich unserm clostir, auch in sulchir masse, daz der egenante Michil Fogolusch, syne erbin und alle syne nochkomen besitczer der selbin fumff morgen wezewachs sullen uns, unsern nochkomen und unserm clostir dovon czinsen und gebin alle iar erblich und ewiclich eyne halbe marg uff sandt Michils tag. Und des kauffs czu eyner ewigen bestetigunge und auch czu guter beweysunge, habe wir desen briff dorubir lossen schriben und vorsegiln mit unsern segiln unser epthye und unser sampnunge am dinstage vor sandt Urbans tag noch gots geburdt virczenhundert iar und dornoch in dem vir und czwenczigsten iare czu Kamencz in unserm closter.

Or. Perg. An einem Pergamentstreifen das starkbeschädigte Abtsiegel; das andere fehlt.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.